సముద్ర గర్భంలో కలిసిపోయి దశాబ్దాలు గడుస్తున్నా.. టైటానిక్ అంటే ప్రపంచానికి ఇప్పటికీ అదే క్రేజ్. ఆ మహా విషాదానికి సంబంధించిన ఏ చిన్న వస్తువు దొరికినా, అది చరిత్రకు సజీవ సాక్ష్యంగా నిలుస్తోంది. తాజాగా, టైటానిక్ ప్రమాదం నుంచి ఒక ప్రాణాన్ని కాపాడిన లైఫ్ జాకెట్, వేలంలో రికార్డు సృష్టించింది. లండన్‌లో జరిగిన చారిత్రక వస్తువుల వేలంలో ఈ లైఫ్ జాకెట్ అక్షరాలా 9 కోట్ల రూపాయలకు అమ్ముడుపోయింది. ఇంగ్లాండ్‌కు చెందిన ప్రసిద్ధ ‘హెన్రీ ఆల్డ్రిడ్జ్ అండ్ సన్’ సంస్థ నిర్వహించిన ఈ వేలంలో, ప్రపంచవ్యాప్తంగా ఉన్న సేకర్తలు పోటీ పడ్డారు.

నిజానికి ఈ జాకెట్ గరిష్టంగా 3.5 లక్షల పౌండ్లు పలుకుతుందని నిర్వాహకులు అంచనా వేశారు. కానీ, అందరి అంచనాలను తలకిందులు చేస్తూ 6,70,000 పౌండ్ల ధర పలికింది. దీనికి పన్నులు, ఫీజులు అన్నీ కలిపితే సుమారు 9 కోట్ల రూపాయలకు చేరింది. ఒక అజ్ఞాత వ్యక్తి ఫోన్ ద్వారా వేలంలో పాల్గొని దీన్ని దక్కించుకున్నారు. ఇంతటి భారీ ధర పలకడానికి ఈ జాకెట్ వెనుక ఉన్న కథే కారణం. ఇది టైటానిక్ నౌకలో ప్రయాణించిన ‘లారా మాబెల్ ఫ్రాంకటెల్లి’ అనే మహిళకు చెందినది. ఆమె అప్పటి ప్రముఖ ఫ్యాషన్ డిజైనర్ లూసీ డఫ్ గోర్డాన్ వద్ద సెక్రటరీగా పనిచేసేవారు.

1912 ఏప్రిల్ 14 రాత్రి టైటానిక్ మంచుకొండను ఢీకొన్నప్పుడు.. లారా మాబెల్ తన యజమానులతో కలిసి ‘లైఫ్ బోట్ నంబర్ 1’ ద్వారా సురక్షితంగా బయటపడ్డారు. ఆమె ప్రాణాలను కాపాడిన ఆ జాకెట్, క్యాన్వాస్ వస్త్రం, కార్క్ ముక్కలతో తయారైంది. ఈ జాకెట్‌కు ఉన్న మరో విశిష్టత ఏమిటంటే.. దీనిపై లారా మాబెల్‌తో పాటు, ఆ ప్రమాదం నుంచి ప్రాణాలతో బయటపడిన మరో ఎనిమిది మంది వ్యక్తుల సంతకాలు కూడా ఉన్నాయి. అంటే, ఆ భయానక రాత్రికి ఇది తొమ్మిది మంది సంతకాలతో కూడిన ఒక సజీవ సాక్ష్యం.

వంద ఏళ్లకు పైగా కాలం గడిచినా, ఉప్పు నీటిలో తడిసినా ఈ జాకెట్ ఇప్పటికీ చెక్కుచెదరకుండా ఉండటం విశేషం. అందుకే చారిత్రక పరిశోధకులు, సేకర్తలు దీనిని దక్కించుకోవడానికి అత్యంత ఆసక్తి కనబరిచారు. కేవలం లైఫ్ జాకెట్ మాత్రమే కాదు.. అదే వేలంలో టైటానిక్ లైఫ్ బోట్‌కు చెందిన ఒక సీటు కుషన్ కూడా నాలుగున్నర కోట్ల రూపాయలకు పైగా ధర పలికింది. ఎన్ని ఏళ్లు గడిచినా ‘అన్ సింకబుల్’ షిప్ టైటానిక్ జ్ఞాపకాలు మాత్రం నేటికీ కోట్లు పలుకుతూనే ఉన్నాయి.