హైదరాబాద్ నగర చరిత్రకు సాక్ష్యంగా నిలిచిన కాచిగూడ రైల్వే స్టేషన్ మరో అరుదైన మైలురాయిని చేరుకుంది. ఆఖరి నిజాం నవాబు మీర్ ఉస్మాన్ అలీ ఖాన్ ఆధ్వర్యంలో నిర్మితమైన ఈ చారిత్రక కట్టడం 110 ఏళ్ల వారసత్వాన్ని పూర్తిచేసుకుంది. గోతిక్ శైలిలో నిర్మించిన ఈ రైల్వే స్టేషన్ నేటికీ తన వైభవాన్ని చాటుకుంటూనే, ఆధునిక సౌకర్యాలతో ప్రయాణికులకు సేవలందిస్తోంది. వారసత్వ సంపదను కాపాడుకుంటూనే పర్యావరణ హిత చర్యలతో దేశవ్యాప్తంగా ప్రత్యేక గుర్తింపు పొందింది.