అమెరికాలో థ్యాంక్స్‌ గివింగ్‌ డిన్నర్స్‌ జోరందుకున్నాయి. ఈ సందర్భంగా అమెరికాలోని నోర్‌ఫోక్స్‌ నేవీ స్థావరంలో మిలటరీ సిబ్బంది కుటుంబాలకు అధ్యక్షుడు జోబైడెన్‌ ‘ఫ్రెండ్స్‌ గివింగ్‌’ విందు ఇచ్చారు. ఈ సందర్భంగా అధ్యక్షుడే స్వయంగా వడ్డించారు. ఆయన తన సతీమణి జిల్‌తో కలిసి ఆహార కౌంటర్‌లోకి వచ్చారు. ఈ విందులో బైడెన్‌ మాష్‌డ్‌ పొటాటోను వడ్డించగా జిల్‌ స్వీట్‌ పొటాటో కాసెరోల్స్‌ను అతిథులకు తినిపించారు. ఈ విందుకు ఎయిర్‌క్రాఫ్ట్‌ క్యారియర్లు అయిన ఐసన్‌ హోవర్‌, గెరాల్డ్‌ ఆర్‌ ఫోర్డ్‌ సిబ్బంది, వారి కుటుంబాలు హాజరయ్యాయి. ప్రస్తుతం ఈ రెండు నౌకలను ఇజ్రాయెల్‌-హమాస్‌ ఘర్షణల నేపథ్యంలో మధ్యధరా సముద్రంలో మోహరించారు. ఈ ఆపరేషన్‌కు మీరు వెన్నెముకని మీ కుటుంబ సభ్యులు దీనికి గుండెవంటి వారని బైడెన్‌ వ్యాఖ్యానించారు. నేడు బైడెన్‌ 81వ పుట్టిన రోజు జరుపుకుంటున్నారు. అమెరికా చరిత్రలో అత్యంత వృద్ధ అధ్యక్షుడిగా జోబైడెన్‌ రికార్డు సృష్టించారు.