యూపీఐ వినియోగదారులకు కేంద్రం మరోసారి కీలక స్పష్టత ఇచ్చింది. స్నేహితులకు డబ్బు పంపడం, దుకాణాల్లో చెల్లింపులు చేయడం, క్యూఆర్‌ కోడ్‌ స్కాన్‌ చేయడం వంటి వ్యక్తిగత లావాదేవీలపై ఎలాంటి ఛార్జీలు ఉండవని తెలిపింది. నెలకు రూ.లక్ష వరకు యూపీఐ ద్వారా సంపాదించే వ్యాపారులకు కూడా ఛార్జీల నుంచి మినహాయింపు కొనసాగుతుందని స్పష్టం చేసింది.
దేశంలో జరిగే 95 శాతానికి పైగా వ్యాపార చెల్లింపులు రూ.2 వేల లోపే ఉంటాయని.. వీటికి ఎలాంటి రుసుము లేదని కేంద్రం పేర్కొంది. మరోవైపు యూపీఐ వ్యవస్థలో మర్చంట్‌ డిస్కౌంట్‌ రేట్‌ మార్పుల వెనుక విదేశీ శక్తుల ప్రభావం ఉందంటూ వస్తున్న ప్రచారాన్ని ఆర్థిక మంత్రిత్వ శాఖ ఖండించింది. యూపీఐకి సంబంధించిన విధాన నిర్ణయాలన్నీ దేశ ప్రయోజనాలను దృష్టిలో ఉంచుకుని స్వతంత్రంగా తీసుకుంటామని తెలిపింది.
2016లో ప్రారంభమైనప్పటి నుంచి యూపీఐ భారతీయ నిబంధనల ప్రకారమే అభివృద్ధి చెందిందని కేంద్రం వెల్లడించింది. ప్రపంచంలోనే అతిపెద్ద రియల్‌టైమ్‌ చెల్లింపుల వ్యవస్థగా యూపీఐ ఎదిగిందని తెలిపింది. 2026 ఆగస్టులోనే యూపీఐ ద్వారా ఏకంగా 24.5 బిలియన్ లావాదేవీలు జరిగినట్లు కేంద్రం పేర్కొంది.