ఏలూరు లో ఫేక్ సర్టిఫికెట్ల ముఠా గుట్టు రట్టు

కేటుగాళ్లు రెచ్చిపోతున్నారు. కాసుల కక్కుర్తితో అడ్డదారులు తొక్కుతున్నారు. చదువుకోకపోయినా పర్లేదు.. డబ్బు ఇస్తే చాలు చేతిలో సర్టిఫికెట్లు చేతిలో పెడుతున్నారు. టెన్త్, ఇంటర్, డిగ్రీ, బీటెక్, ఎంటెక్.. ఇలా ఏదైనా.. చదువుకోకపోయినా సర్టిఫికెట్ మీ చేతికి అందుతుంది. డబ్బు చెల్లిస్తే చాలు పనైపోతుంది. తాజాగా వారి పాపం పండింది. నకిలీ సర్టిఫికెట్ల తయారీ ముఠా గుట్టు రట్టైంది.
ఏలూరులో కలకలం రేగింది. నకిలీ సర్టిఫికెట్ల తయారీ ముఠాను పోలీసులు అరెస్ట్ చేశారు. నకిలీ ధ్రువపత్రాల తయారీని ఏలూరులోని ప్రైవేట్ కాలేజీ మేనేజ్ మెంట్ గుర్తించింది. దూరవిద్యకు సంబంధించి కళాశాలను యాజమాన్యం నడుపుతోంది. తమ కాలేజీకే సంబంధించిన నకిలి సర్టిఫికెట్లను మేనేజ్ మెంట్ గుర్తించింది. దాంతో కాలేజీ యాజమాన్యం నివ్వెరపోయింది. దీన్ని సీరియస్ గా తీసుకుంది.
వెంటనే అలర్ట్ అయిన కాలేజీ యాజమాన్యం దీనిపై పోలీసులకు ఫిర్యాదు చేశారు. వారి ఫిర్యాదుతో కేసు నమోదు చేసి విచారణ చేపట్టారు చింతలపూడి పోలీసులు. విచారణలో షాకింగ్ విషయాలు వెలుగుచూశాయి. చింతలపూడికి చెందిన కొలుకులూరి సోంబాబుని అదుపులోకి తీసుకున్నారు పోలీసులు. ముఠా సభ్యులపై నిఘా పెట్టారు. నకిలీ సర్టిఫికెట్లు తయారు చేస్తున్న ముగ్గురు సభ్యుల మఠాను అరెస్ట్ చేశారు.