శనివారం వైకుంఠ ఏకాదశిని పురస్కరించుకుని భారీ సంఖ్యలో భక్తులు తిరుమలకు వస్తున్నారు. ఇప్పటికే వైకుంఠం క్యూ కాంప్లెక్స్ షెడ్లు నిండిపోయాయి. దీంతో సర్వదర్శనానికి కంపార్ట్ మెంట్ల లోపలికి భక్తులను అనుమతించడంలేదు. ఇప్పటి వరకు కంపార్ట్ మెంట్లలో వేచి ఉన్న వారికే మాత్రం దర్శనం కల్పిస్తామని అధికారులు చెబుతున్నారు. ఈరోజు సర్వదర్శనానికి అనుమతించక పోవడంపై భక్తులు ఆగ్రహం వ్యక్తం చేస్తున్నారు. భక్తులను క్యూలైన్ల ప్రారంభం వద్దనే పోలీసులు అడ్డుకుంటున్నారు. సర్వదర్శనానికి ఎందుకు వెళ్లనీయడం లేదని భక్తులు పోలీసులతో వాగ్వాదానికి దిగుతున్నారు. ప్రస్తుతం క్యూ లైన్లలో ఉన్న భక్తులకు ఇవాళ రాత్రికి దర్శనం లభించే అవకాశం ఉంది.
