CM KCR | కాంగ్రెస్ విఫల పార్టీ.. దానికో విధానమంటూ లేదు: సీఎం కేసీఆర్

కాంగ్రెస్‌ పాలిత రాష్ట్రాల్లో రూ.2వేల పింఛను ఇస్తున్నట్టు నిరూపిస్తే ముక్కు నేలకు రాస్తాను అని సీఎం కేసీఆర్ అన్నారు. జనగామ నియోజకవర్గ పరిధిలోని చేర్యాలలో నిర్వహించిన బీఆర్ఎస్ ప్రజా ఆశీర్వాద సభలో సీఎం కేసీఆర్‌ పాల్గొని ప్రసంగించారు.ఎన్నికలు రాగానే ప్రజలు ఆగం కాకూడదు. తెలివితో ఓటు వేస్తేనే తెలివైన ప్రభుత్వం వస్తుందన్నారు. రాష్ట్రం తలరాతను మార్చే ఓటును వివేకంతో వేయాలన్నారు. ఉన్న తెలంగాణను ఆంధ్రలో కలిపి 58 ఏళ్లు గోస పెట్టిందే కాంగ్రెస్‌ అని విమర్శించారు. బీఆర్ఎస్ గెలిస్తే.. పింఛన్లు క్రమంగా రూ.5వేలకు పెంచుతామని హామీ ఇచ్చారు. సంపద పెరిగే కొద్దీ సంక్షేమ పథకాలు పెంచుకుంటూ పోతున్నామన్నారు. జనగామ అభ్యర్థి పల్లా రాజేశ్వర్‌రెడ్డి గెలిస్తే రైతు బంధు రూ.16వేలు వస్తాయన్నారు. అదే కాంగ్రెస్‌ వాళ్లు గెలిస్తే ఉన్న రైతు బంధు కూడా పోతుందని, ఇవన్నీ ప్రజలు గమనించాలని కేసీఆర్ కోరారు. నన్ను చూసి కాంగ్రెస్‌, బీజేపీ భయపడుతున్నాయన్నారు. రాష్ట్రానికే పరిమితం చేయాలని చూస్తున్నాయని విమర్శించారు.