ఆర్టీసీలో కారుణ్య నియామకం చేయండి – యువకుని ఆవేదన

ఆర్టీసీలో కారుణ్య నియామకం కోసం పది సంవత్సరాల నుంచి తిరుగుతున్న పట్టించుకోవడం లేదని ఓ యువకుడు దుబాయ్ నుండి మాట్లాడిన వీడియో లో ఆవేదన వ్యక్తం చేస్తున్నాడు. తాను మాట్లాడుతూ రికార్డ్ చేసిన వీడియోను పంపాడు. జగిత్యాల అర్బన్ మండలం హస్నాబాద్ కు చెందిన రాగుల వెంకటేష్ తండ్రి మల్లయ్య జగిత్యాల ఆర్టీసీ డిపోలో పని చేసేవాడు. అప్పట్లో బస్సు రిపేర్ చేస్తుండగా బలమైన రాడ్డు కాళ్లపై పడి తీవ్ర గాయాలయ్యాయి. అప్పటి నుండి మెట్పల్లి, మంథని డిపోల్లో కొనసాగుతూ ఉన్నాడు. మంథని డిపో మేనేజర్ సూచన మేరకు కరీంనగర్ లో వైద్య పరీక్షల కోసం వెళ్లగా నీవు ఉద్యోగం చేయడానికి పనికి రావని వైద్యులు తేల్చి చెప్పారు. ఈ లోగా కాలి గాయం విషమయంగా మారి మల్లయ్య మృతి చెందాడు. అయితే మల్లయ్య కుమారుడు వెంకటేష్ ఆర్టీసీ లో కారుణ్య నియామకం కోసం 10 సంవత్సరాల నుండి ప్రయత్నం చేసినా ఫలితం లేకపోవడంతో ఉపాధి కోసం దుబాయ్ వెళ్ళాడు. రాష్ట్రంలో ఇటీవల కాంగ్రెస్ అధికారంలోకి రావడంతో ఇప్పటికైనా తనకు ఆర్టీసీలో కారుణ్య నియామకం కింద ఉద్యోగం ఇప్పించాలని దుబాయ్ నుండి వెంకటేష్ ప్రభుత్వాన్ని వేడుకుంటున్నాడు.