వచ్చే లోక్ సభ ఎన్నికల్లో కాంగ్రెస్ పార్టీకి కనీసం 40 సీట్లు కూడా వస్తాయో రావోనని బెంగాల్ ముఖ్యమంత్రి మమతా బెనర్జీ సంచలన వ్యాఖ్యలు చేశారు. ఇండియా కూటమిలో సీట్ల పంపకాల విషయంలో తేడాలు రావడపై మమత మండిపడ్డారు. వచ్చే లోక్ సభ ఎన్నికల్లో ఉమ్మడిగా పోరాడాలనే నిర్ణయం మేరకు కాంగ్రెస్ తో సీట్ల పంపకాలకు టీఎంసీ సిద్ధమైందని మమత చెప్పారు. రాష్ట్రంలోని 42 సీట్లలో 2 సీట్లు కాంగ్రెస్ పార్టీకి ఆఫర్ చేసినట్లు వివరించారు. అయితే, తమ ప్రతిపాదనకు కాంగ్రెస్ నేతలు ఒప్పుకోలేదని, మరిన్ని సీట్లు ఇవ్వాలని డిమాండ్ చేశారని ఆరోపించారు. దీంతో మొత్తం అన్ని నియోజకవర్గాల్లో పోటీ చేయాలని టీఎంసీ నిర్ణయించిందని తెలిపారు. ఇప్పుడు కాంగ్రెస్ పార్టీకి కేవలం రెండు సీట్లు కాదు మొత్తం 42 సీట్లలో కాంగ్రెస్ పార్టీ ఒంటరిగా పోటీ చేసి సత్తా చూపించాలని మమతా సవాల్ విసిరారు.
