“My first vote for CBN” :
ధర్మాన్ని కాపాడే ఓటును ప్రతి ఒక్కరు వినియోగించుకోవాలనీ మాజీ ఉపసభాపతి మండలి బుద్ధ ప్రసాద్ తేలిపారు. అవనిగడ్డ తెలుగుదేశం పార్టీ కార్యాలయంలో జరిగిన “మై ఫస్ట్ ఓట్ ఫర్ సీబీఎన్”(“My first vote for CBN”) కార్యక్రమంలో బుద్ధ ప్రసాద్ ముఖ్య అతిథిగా పాల్గొన్నారు. ఈ సందర్భంగా నూతనంగా ఓటు హక్కు వచ్చిన యువతి యువకులను ఉద్దేశించి బుద్ధప్రసాద్ మాట్లాడారు. ప్రపంచంలోనే అతి పెద్ద ప్రజాస్వామ్యం గల దేశం భారతదేశం మాత్రమేనని, అతివంటి దేశంలో మీరు వేసే ఓటు ప్రజాస్వామ్యానికి చేటు కాకూడదు అని బుద్ధప్రసాద్ అన్నారు. ఓటు వేసే ముందు ఎవరికి వేయాలి, ఎటువంటి వారికి వేయాలో ముందుగా ఆలోచించుకుని వేయాలని, మనం వేసే ఓటు చరిత్ర గతిని మారుస్తోందని అన్నారు. మన గ్రామం, మన రాష్ట్రం, మన దేశం భవిష్యత్తు మనం ఎన్నుకునే లీడర్ పైనే ఆధారపడి ఉంటుందని తెలియచేసారు. దానికోసం సరైన విజన్ గల నాయకుడిని ఎన్నుకోవాలని కోరారు. అటువంటి విజన్ గల నాయకుడు చంద్రబాబు నాయుడు మాత్రమేనని అన్నారు. 78 సంవత్సరాల వయసులో కూడా యువత భవిత కోసం ఆలోచిస్తున్న ఏకైక నాయకుడు చంద్రబాబు నాయుడు అన్నారు.
Follow us on : Facebook, Instagram & YouTube.
నాడు చంద్రబాబు నాయుడు విజన్ 2020 ని ప్రారంభించి రాష్ట్రానికి ఐటి కంపెనీలను తీసుకుని వచ్చారని గుర్తుచేశారు. రాష్ట్ర విభజన అనంతరం యువతకు ఉద్యోగ అవకాశాలు కల్పించడానికి ఎన్నో పరిశ్రమలను తీసుకుని వస్తే, వైసీపీ ప్రభుత్వం ఏర్పడిన తర్వాత వచ్చిన కంపెనీలను కూడా రాష్ట్రం నుండి బయటకు పంపించేసారని అన్నారు. అబద్ధపు హామీలు ఇచ్చి ప్రజలను మోసం చేసారని అన్నారు. కావున మొదటిసారి ఓటు హక్కుని వినియోగించుకునే ప్రతి ఒక్కరూ కూడా రాష్ట్రాన్ని ఎవరైతే అభివృద్ధి పథంలో నడిపిస్తారో గుర్తించి, వారికి ఓటు వేయాలని కోరారు. మొదటిసారి మీరు వేసే ఓటు రాష్ట్ర భవిష్యత్తుని నిర్ణయిస్తుందని తెలిపారు. తాను ఎమ్మెల్యే గా ఉన్న సమయంలో భారత రాష్ట్రపతి అభ్యర్థిగా డా.ఏపీజే అబ్దుల్ కలాం కి వేసిన ఓటు తనకెంతో సంతృప్తిని ఇచ్చిందని బుద్ధ ప్రసాద్ గుర్తుచేసుకున్నారు. ఈ కార్యక్రమంలో తెలుగుదేశం పార్టీ జిల్లా ఉపాధ్యక్షులు మండలి వెంకట్రామ్, టిడిపి నాయకులు పాల్గొన్నారు.