బీఆర్ఎస్ కార్యనిర్వాహక అధ్యక్షుడు కేటీఆర్‌ ఉదయం ఆటోలో ప్రయాణించారు. యూసుఫ్‌గూడలో జూబ్లీహిల్స్‌ నియోజకవర్గ విస్తృతస్థాయి కార్యకర్తల సమావేశంలో పాల్గొన్న ఆయన, బయటకు వచ్చిన అనంతరం తన కారులో కాకుండా రోడ్డుపై ఓ ఆటో ఎక్కారు. ఆయన వెంట ఎమ్మెల్యే మాగంటి గోపీనాథ్‌, మైనార్టీ విభాగం నాయకుడు షేక్‌ అబ్దుల్లా సొహైల్‌ తప్ప భద్రతా సిబ్బంది ఎవరూ రాలేదు. అక్కడి నుంచి జూబ్లీహిల్స్‌లోని తెలంగాణ భవన్‌ వరకు ప్రయాణించారు. ఈ మేరకు ఆటోడ్రైవర్‌కు ఛార్జీ చెల్లించారు. ఈ సందర్భంగా కేటీఆర్‌ మాట్లాడుతూ.. కాంగ్రెస్‌ ప్రభుత్వం మహిళలకు ఉచిత బస్సు పథకం ప్రవేశపెట్టడంతో ఆటోవాలాల పరిస్థితి దుర్భరంగా మారిందని, వారికి సంఘీభావంగా ఆటోలో ప్రయాణించానని వెల్లడించారు. ఈ సమయంలో డ్రైవర్ల సమస్యలు అడిగి తెలుసుకున్నానన్నారు. వారి డిమాండ్లు పరిష్కరించేలా ప్రభుత్వంపై ఒత్తిడి తెస్తామని పేర్కొన్నారు. ‘బస్సుల్లో మాదిరే ఆటోల్లోనూ మహిళలకు ఉచిత ప్రయాణం కల్పించి, ఆ మేరకు ప్రభుత్వం మాకు డబ్బులు చెల్లించేలా చూడాలి’ అని ఆటోడ్రైవర్‌ ఆయన్ను కోరారు.
