ఐదు రాష్ట్రాల భవితవ్యం తేలే సమయం వచ్చేసింది. యావత్ దేశం ఆసక్తిగా ఎదురుచూస్తున్న పశ్చిమ బెంగాల్, తమిళనాడు, కేరళ, అస్సాం మరియు పుదుచ్చేరి అసెంబ్లీ ఎన్నికల కౌంటింగ్‌కు సర్వం సిద్ధమైంది. నేడు ఉదయం 8 గంటల నుంచే ఓట్ల లెక్కింపు ప్రారంభం కానుంది. గెలుపు గుర్రాలు ఎవరో.. పీఠం ఎక్కేది ఎవరో మరికొన్ని గంటల్లో తేలిపోనుంది. కౌంటింగ్ కేంద్రాల వద్ద భారీ భద్రత, ఈవీఎంల చుట్టూ త్రీ-లేయర్ ప్రొటెక్షన్.. వెరసి దేశ రాజకీయ ముఖచిత్రాన్ని మార్చబోయే ఆ మహా సంగ్రామ ఫలితాలపై దేశవ్యాప్తంగా ఉత్కంఠ నెలకొంది. ఓట్ల లెక్కింపు ప్రక్రియ సురక్షితంగా, పారదర్శకంగా సాగేందుకు ఎన్నికల సంఘం అన్నీ ఏర్పాట్లు చేసింది. కౌంటింగ్ కేంద్రాల పరిసరాల్లో శాంతిభద్రతల ఏర్పాట్లను పోలీసు పరిశీలకులు పర్యవేక్షిస్తారని తెలిపింది. ఈసీఐనెట్ ద్వారా జారీ చేసిన క్యూఆర్ కోడ్ ఆధారిత ఫొటో గుర్తింపు కార్డు కలిగి ఉన్నవారిని మాత్రమే కౌంటింగ్ కేంద్రాల్లోకి అనుమతించనున్నట్లు పేర్కొంది.
ఒకటి కంటే ఎక్కువ కౌంటింగ్‌ హాళ్లు ఉన్న నియోజకవర్గాల్లో మొత్తం 165 మంది ఎన్నికల, 77 మంది పోలీసు పరిశీలకులను నియమించింది. ఓట్ల లెక్కింపు ప్రక్రియ సాఫీగా, పారదర్శకంగా సాగేందుకు అన్నీ చర్యలు తీసుకున్నట్లు వెల్లడించింది. ఇక తమిళనాడులో క్యాంప్‌ పాలిటిక్స్‌ మరింత హీట్‌ పెంచేస్తున్నాయి. టీవీకే అభ్యర్థులు చేజారకుండా అప్రమత్తమయ్యారు TVK చీఫ్ విజయ్. మహాబలిపురంలో రిసార్ట్ బుక్ చేసిన విజయ్..గెలిచిన వెంటనే అభ్యర్థులు నేరుగా రిసార్ట్‌కు రావాలని ఆదేశాలు జారీ చేశారు. తమిళనాడులో హంగ్ వచ్చే అవకాశం ఉందని ఎగ్జిట్ పోల్స్ వెల్లడించడంతో..కౌంటింగ్‌కు ఒకరోజు ముందే రిసార్ట్ బుక్ చేశారు విజయ్‌. తమ అభ్యర్థులను క్యాంప్‌లకు తరలిస్తున్నారు. ఇక కౌంటింగ్ ప్రక్రియలో ఎలాంటి న్యాయపరమైన సమస్యలు ఎదురైనా ఎదుర్కొనేందుకు పార్టీ లీగల్ వింగ్‌ను కూడా అప్రమత్తం చేశారు. కౌంటింగ్ కేంద్రాల వద్ద అదనపు భద్రత కల్పించాలని ఎన్నికల సంఘాన్ని కోరారు. మరోవైపు, అధికార డీఎంకే మాత్రం తాము అతిపెద్ద పార్టీగా అవతరించి మళ్లీ అధికారంలోకి రావడం ఖాయమని ధీమా వ్యక్తం చేస్తోంది.