పశ్చిమగోదావరి జిల్లా మొగల్తూరులో సీఎం చంద్రబాబు పర్యటన సందర్భంగా నరసాపురం ఎమ్మెల్యే బొమ్మిడి నాయకర్‌ పనితీరుపై చేసిన వ్యాఖ్యలను వైసీపీ మాజీ ఎమ్మెల్యే ముదునూరి ప్రసాదరాజు విమర్శించడంపై కాపు కార్పొరేషన్‌ చైర్మన్‌ కొత్తపల్లి సుబ్బారాయుడు మండిపడ్డారు. చంద్రబాబును విమర్శించే స్థాయి ప్రసాదరాజుది కాదని అన్నారు. ఎమ్మెల్యేలు పనితీరును మెరుగుపరుచుకోవాలని సీఎం సూచించడం అవమానం కాదని, ప్రజాప్రతినిధుల బాధ్యతను గుర్తు చేయడమేనని పేర్కొన్నారు. చంద్రబాబుకు రాష్ట్ర అభివృద్ధిపై స్పష్టమైన విజన్‌, సుదీర్ఘ రాజకీయ అనుభవం ఉందని కొత్తపల్లి కొనియాడారు. నరసాపురం నియోజకవర్గ అభివృద్ధికి ప్రభుత్వం చిత్తశుద్ధితో పనిచేస్తోందని, సీఎం పర్యటనను రాజకీయ కోణంలో చూడటం సరికాదన్నారు. చంద్రబాబు స్థాయి, విజన్‌, రాజకీయ అనుభవాన్ని అర్థం చేసుకోకుండా ప్రసాదరాజు విమర్శలు చేయడం తగదని స్పష్టం చేశారు.

కాకినాడలో పిఠాపురం మాజీ ఎమ్మెల్యే వర్మ కత్తిపూడి వద్ద గోదావరి జలాలకు నమస్కరించి పురుషోత్తపట్నం ప్రాజెక్టుపై కీలక వ్యాఖ్యలు చేశారు. ఎన్నికల్లో సీటు త్యాగం చేస్తే నిలిచిపోయిన పురుషోత్తపట్నం ప్రాజెక్టును తిరిగి ప్రారంభిస్తామని చంద్రబాబు నుంచి హామీ తీసుకున్నానన్నారు. గత ప్రభుత్వంలో ప్రాజెక్టును అడ్డుకునేందుకు అప్పటి ఎమ్మెల్యే, ఎంపీలు లేఖలు ఇచ్చారని, రైతులు రోడ్డెక్కినా స్పందించలేదని ఆరోపించారు. టీడీపీ పోరాటంతోనే పురుషోత్తపట్నం ప్రాజెక్టు పూర్తయిందన్నారు.

చంద్రబాబు రూ.1,650 కోట్లతో ఎనిమిది నెలల్లో ప్రాజెక్టు పనులు పూర్తి చేశారని వర్మ తెలిపారు. పురుషోత్తపట్నం ద్వారా ఏలేరు ప్రాజెక్టు పరిధిలోని ఐదు నియోజకవర్గాల రైతులకు సాగునీరు అందుతుందని, లక్ష ఎకరాలకు రెండు పంటలకు నీరు లభిస్తుందని చెప్పారు. ఏలేరు నుంచి తాండవకు నీటిని తరలించే ప్రయత్నాలను మాజీ మంత్రి దాడిశెట్టి రాజా అడ్డుకోవాలని, పురుషోత్తపట్నం ప్రాజెక్టును ఎందుకు వ్యతిరేకించారో చెప్పాలని డిమాండ్ చేశారు. చంద్రబాబును ఐదు జిల్లాలకు అపర భగీరథుడిగా అభివర్ణించారు.

విజయవాడ ప్రభుత్వ దంత వైద్య కళాశాలలో అభివృద్ధి పనులు ప్రారంభమయ్యాయి. విద్యార్థులు, రోగులకు మెరుగైన వసతులు కల్పించే లక్ష్యంతో రూ.60 లక్షల వ్యయంతో చేపట్టిన పలు అభివృద్ధి కార్యక్రమాలను ఎంపీ కేశినేని శివనాథ్‌ చిన్ని, ఎమ్మెల్యే గద్దె రామ్మోహన్‌, ప్రభుత్వ సలహాదారు షరీఫ్‌ ప్రారంభించారు. ఇందులో భాగంగా డెంటల్‌ చైర్స్‌, 24 బెడ్లు, సీసీ రోడ్లు, పార్కింగ్‌ షెడ్‌, కాంపౌండ్‌ వాల్‌ వంటి సౌకర్యాలు అందుబాటులోకి వచ్చాయి. రోజుకు సుమారు 500 మంది వరకు ఓపీ సేవలు పొందుతున్న నేపథ్యంలో.. రోగులకు మరింత మెరుగైన వసతులు కల్పించేందుకు చర్యలు తీసుకుంటున్నట్లు ఎంపీ తెలిపారు. మెడికల్‌ యూనివర్సిటీలో రోగులు, సహాయకుల కోసం ఆర్‌ఓ ప్లాంట్‌, షెడ్లు ఏర్పాటు చేస్తామన్నారు. డెంటల్‌ విద్యార్థుల కోసం అధునాతన హాస్టల్‌ను త్వరలో ప్రారంభిస్తామని వెల్లడించారు. కళాశాలను మరింత అభివృద్ధి చేసి మెరుగైన వైద్య సేవలు, మౌలిక వసతులు కల్పించడమే లక్ష్యమన్నారు.

ఆంధ్రప్రదేశ్‌లో స్థానిక సంస్థల ఎన్నికలపై మంత్రి నారా లోకేష్ కీలక ప్రకటన చేశారు. స్థానిక సంస్థల ఎన్నికలు అనుకున్న సమయానికే జరుగుతాయని.. ఎట్టి పరిస్థితుల్లోనూ వాయిదా వేసే ప్రసక్తే లేదని స్పష్టం చేశారు. అమరావతిలో టీడీపీ మంత్రులతో నిర్వహించిన బ్రేక్‌ఫాస్ట్‌ సమావేశంలో పార్టీ నేతలు, ప్రజాప్రతినిధులకు ఎన్నికలపై దిశానిర్దేశం చేశారు. అక్టోబర్‌ నాటికి ఎన్నికల ప్రక్రియ పూర్తయ్యేలా చర్యలు తీసుకుంటున్నామని తెలిపారు. ముందుగా మున్సిపల్‌ ఎన్నికలు.. ఆ తర్వాత ఎంపీటీసీ, జెడ్పీటీసీ.. చివరగా పంచాయతీ ఎన్నికలు నిర్వహించేలా ప్రణాళిక రూపొందించినట్లు చెప్పారు. పెండింగ్‌ కేసులను పరిష్కరించి అన్ని స్థానాల్లో ఎన్నికలు జరిగేలా కృషి చేస్తున్నామన్నారు. ఎన్నికలు వాయిదా వేయాలంటూ వైసీపీ కోర్టు కేసులతో అడ్డంకులు సృష్టిస్తోందని లోకేష్‌ ఆరోపించారు. ఎన్నికలు వాయిదా పడితే కేంద్ర ఫైనాన్స్‌ కమిషన్‌ నిధులు నిలిచిపోయే అవకాశం ఉందన్నారు. చట్టపరమైన సమస్యలను అధిగమించి ఎన్నికలను సమయానికి పూర్తి చేస్తామని స్పష్టం చేశారు. అలాగే అక్టోబర్‌ నుంచి అర్హులైన వారికి దశలవారీగా కొత్త పింఛన్లు మంజూరు చేస్తామని హామీ ఇచ్చారు.

సీఎం చంద్రబాబు నాయుడు అధ్యక్షతన అమరావతి సచివాలయంలో జరిగిన ఏపీ కేబినెట్‌ భేటీలో పలు కీలక నిర్ణయాలు తీసుకున్నారు. సమావేశం అనంతరం మంత్రి కొలుసు పార్థసారథి కేబినెట్‌ నిర్ణయాలను వెల్లడించారు. రైతులకు ఆర్థికంగా అండగా నిలిచేలా తోతాపురి మామిడికి మద్దతు ధర కోసం రూ.281 కోట్లు కేటాయించేందుకు ఆమోదం తెలిపింది. పొగాకు రైతులకు డీబీటీ ద్వారా రూ.94 కోట్ల సాయం అందించనుంది.అమరావతి అభివృద్ధికి సంబంధించి 6,212.50 ఎకరాల భూసమీకరణకు కేబినెట్‌ ఆమోదం తెలిపింది. ఎర్రుపాలెం-నంబూరు మీదుగా కొత్త బ్రాడ్‌గేజ్‌ రైల్వే లైన్‌, ఇన్నర్‌ రింగ్‌ రోడ్డు, గ్రిడ్‌ రోడ్ల విస్తరణకు ఇది ఉపయోగపడనుంది. శాఖమూరులో రూ.759.79 కోట్లతో ‘అమరావతి సంగమం’ ఏర్పాటుకు గ్రీన్‌సిగ్నల్‌ ఇచ్చింది.

మరోవైపు ఎల్‌నినో, వర్షాభావ పరిస్థితులపై కేబినెట్‌లో సుదీర్ఘంగా చర్చ జరిగింది. రాష్ట్రంలో వర్షపాతం మైనస్‌ 52 శాతంగా ఉన్న నేపథ్యంలో తాగునీటికి అత్యధిక ప్రాధాన్యత ఇవ్వాలని సీఎం ఆదేశించారు. కరువు నివారణకు కేంద్రం నుంచి నిధులు రాబట్టే అంశంపైనా చర్చించారు. స్థానిక సంస్థల ఎన్నికలను ఈ ఏడాదిలోనే పూర్తి చేయాలని, కోర్టు పరిధిలో ఉన్న 23 మున్సిపాలిటీలతో పాటు మొత్తం 100 మున్సిపాలిటీల్లో ఎన్నికలకు ఏర్పాట్లు చేయాలని సీఎం సూచించారు.కృష్ణా, ఎన్టీఆర్‌, గుంటూరు, బాపట్ల జిల్లాల్లో 78 వరద పునరుద్ధరణ పనులకు రూ.6.25 కోట్లకుపైగా కేటాయింపులకు ఆమోదం తెలిపింది. వెలిగొండ టన్నెల్‌-2 వద్ద టీబీఎం తొలగింపు పనులకు రూ.11.63 కోట్లు మంజూరు చేయనుంది. నిత్యావసర ధరల నియంత్రణపై ప్రత్యేక దృష్టి పెట్టాలని, మంత్రులు ప్రజల్లోకి వెళ్లి ప్రభుత్వ అభివృద్ధి, సంక్షేమ కార్యక్రమాలను వివరించాలని చంద్రబాబు ఆదేశించారు.

ఆంధ్రప్రదేశ్‌లో ఎల్‌నినో ప్రభావంతో తక్కువ వర్షపాతం నమోదవుతున్న నేపథ్యంలో సీఎం చంద్రబాబు నాయుడు అధికారులను అప్రమత్తం చేశారు. రాష్ట్రంలో ఎల్‌నినో పరిస్థితులపై కేంద్ర ప్రభుత్వానికి నేడు లేఖ రాయనున్నట్లు ప్రకటించారు. ప్రతినెలా క్షేత్రస్థాయి పరిస్థితులపై కేంద్రానికి నివేదిక ఇవ్వాలని ఆదేశించారు. 30 ఏళ్లలో ఎన్నడూ లేనంత తక్కువ వర్షపాతం నమోదైందని తెలిపారు. అన్నమయ్య జిల్లాలో 76 శాతం, ప్రకాశం జిల్లాలో 70 శాతం లోటు వర్షపాతం ఉందన్నారు. తాగునీటి సమస్య రాకుండా ముందస్తు చర్యలు తీసుకోవాలని.. అవసరమైన చోట్ల ట్యాంకర్ల ద్వారా నీటిని సరఫరా చేయాలని సూచించారు. ప్రజలకు తాగునీరు అందించేందుకు ఎంతైనా ఖర్చు చేసేందుకు ప్రభుత్వం సిద్ధంగా ఉందన్నారు.