ఆంధ్రప్రదేశ్‌లో పర్యాటక రంగానికి మరింత ఊతమిచ్చేలా వినూత్న కార్యక్రమాలు, మెగా, జిల్లా స్థాయి ఈవెంట్లు నిర్వహించాలని మంత్రి కందుల దుర్గేష్ ఆదేశించారు.
వెలగపూడి సచివాలయంలో జరిగిన టూరిజం మార్కెటింగ్ కమిటీ సమావేశంలో ఏడాదంతా పర్యాటక ఉత్సవాలు, రోడ్‌షోలు నిర్వహణపై చర్చించారు.
గోదావరి పుష్కరాలు–2027 కోసం విస్తృత ప్రచారం, టెంట్ సిటీలు, పిలిగ్రిమ్ ఇన్ఫర్మేషన్ సర్వీసెస్, డిజిటల్ కంటెంట్ రూపకల్పనపై మంత్రి సూచనలు చేశారు.
పర్యాటక ప్రాంతాల అభివృద్ధికి సమగ్ర ప్రాజెక్ట్ నివేదికలు సిద్ధం చేయాలని.. పెట్టుబడులు, ఉపాధి అవకాశాలు పెంచేలా చర్యలు తీసుకోవాలని ఆదేశించారు.

సెప్టెంబర్ 4వ తేదీ నర్సీపట్నం నియోజకవర్గంలో మెగా బ్లడ్ క్యాంప్ నిర్వహిస్తామన్నారు స్పీకర్ అయ్యన్నపాత్రుడు. తన పుట్టిన రోజును పురస్కరించుకుని రక్తదానం చేయాలని ప్రజలకు సూచించారు. రక్తం అందక ఎంతోమంది ప్రాణాలు కోల్పోతున్న తరుణంలో, ప్రాణదాతలుగా నిలవడం ఎంతో పుణ్యకరమైన కార్యమన్నారు. ప్రజలు, దాతల సౌకర్యార్థం ఆ రోజు ఉదయం 9 గంటల నుంచి రెండు ప్రత్యేక కేంద్రాలలో ఈ రక్తదాన శిబిరాలను ఏర్పాటు చేస్తున్నారు. రద్దీని నియంత్రించేందుకు వీలుగా పెద బొడ్డేపల్లి మార్కెట్ యార్డులో ఒక శిబిరాన్ని, అలాగే నర్సీపట్నం ఏరియా ఆసుపత్రిలో మరో శిబిరాన్ని నిర్వహిస్తున్నారు. పెద బొడ్డేపల్లి కేంద్రానికి మాకవరపాలెం మండలం మరియు చుట్టుపక్కల గ్రామాల ప్రజలు హాజరుకావాలని, ఏరియా ఆసుపత్రి కేంద్రానికి గొలుగొండ, నాతవరం మండలాలు, నర్సీపట్నం పట్టణ ప్రజలు విచ్చేసి రక్తదానం చేయాలని స్పీకర్ సూచించారు. నియోజకవర్గంలోని యువత, విద్యార్థులు, స్వచ్ఛంద సంస్థలు పెద్ద ఎత్తున తరలివచ్చి ఈ సేవా కార్యక్రమాన్ని విజయవంతం చేయాలని అయ్యన్నపాత్రుడు కోరారు.

ఏపీ డిప్యూటీ సీఎం, జనసేనాని పవన్ కల్యాణ్ పుట్టినరోజు సందర్భంగా జనసేన పార్టీ యువజన విభాగాన్ని ఆవిష్కరించారు. జనసేన పార్టీ యువజన విభాగానికి ‘జై కొట్టు’ అని నామకరణం చేశారు. కాకినాడ జిల్లా పిఠాపురంలో బుధవారం జరిగిన ఓ భారీ కార్యక్రమంలో పార్టీ రాజకీయ వ్యవహారాల కమిటీ ఛైర్మన్, రాష్ట్ర పౌరసరఫరాల శాఖ మంత్రి నాదెండ్ల మనోహర్ ఈ యువజన విభాగం లోగోను ఆవిష్కరించారు. ఈ కార్యక్రమంతో పిఠాపురం జనసేన శ్రేణుల నినాదాలతో మార్మోగిపోయింది.

ఈ సందర్భంగా వేలాది బైకులతో భారీ ర్యాలీ నిర్వహించారు. ‘జై జనసేన’, ‘జై పవన్ కల్యాణ్’ నినాదాలతో పట్టణ వీధులు దద్దరిల్లాయి. ఈ కార్యక్రమానికి జనసేన అధినేత, ఉప ముఖ్యమంత్రి పవన్ కల్యాణ్ తన ఆడియో సందేశాన్ని పంపారు. గత కొంతకాలంగా అనారోగ్య సమస్యల కారణంగా పవన్ కల్యాణ్ పూర్తిస్థాయిలో సమయం కేటాయించలేకపోతున్నారని, అయినప్పటికీ ఆయన ఆలోచనలు ఎల్లప్పుడూ ప్రజల సంక్షేమం చుట్టూనే ఉంటాయని నాదెండ్ల మనోహర్ తెలిపారు.

అనంతరం నాదెండ్ల మాట్లాడుతూ.. గత ఎన్నికల్లో కూటమి విజయంలో జనసేన పార్టీ కీలక పాత్ర పోషించిందని గుర్తుచేశారు. “నిరంకుశ జగన్‌ను ఓడించి, ప్రజల ప్రభుత్వాన్ని ఏర్పాటు చేయడంలో మనమందరం సఫలమయ్యాం” అని అన్నారు. పవన్ కల్యాణ్ ఆశయాలకు అనుగుణంగా యువత పార్టీని ముందుకు నడిపించాలని పిలుపునిచ్చారు.