బండి సంజయ్ సంచలన వ్యాఖ్యలు

ప్రభుత్వాలను కూల్చే చరిత్ర కాంగ్రెస్‌దేనని, రాష్ట్రంలో ఆ పార్టీ పరిస్థితి దినదిన గండంగా మారిందని బీజేపీ జాతీయ కార్యదర్శి బండి సంజయ్ సంచలన వ్యాఖ్యలు చేశారు. కాంగ్రెస్ పార్టీ నమ్మించి ఓట్లు వేయించుకుందని, ఫిబ్రవరి 1కి గ్రూప్-1 నోటిఫికేషన్ ఇస్తారని నమ్మకంతో యువత ఓట్లు వేశారన్నారు. కానీ కాంగ్రెస్ వారిని నమ్మించి నట్టేట ముంచిందని బండి ఆగ్రహం వ్యక్తంచేశారు. నోటిఫికేషన్ ఇవ్వకపోవడానికి కారణమేంటో సమాధానం చెప్పాలని ఆయన ప్రశ్నించారు. ప్రభుత్వానికి ఏమాత్రం చిత్తశుద్ధి ఉన్నా ఎన్నికల కోడ్ రాకముందే నిబద్ధతతో గ్రూప్ 1 నోటిఫికేషన్ ఇవ్వాలని ఆయన డిమాండ్ చేశారు. యాసంగి స్టార్ట్ అయిందని, కాంగ్రెస్ పార్టీ రైతు బంధు హామీ నెరవేర్చలేదని బండి మండిపడ్డారు. మహిళలకు ఉచిత ప్రయాణం అందించడం మంచి పథకమేనని, దానిని ఎవరూ వ్యతిరేకించలేదన్నారు. అయితే ఆటో డ్రైవర్లను ఆదుకోవాల్సిన బాధ్యత ప్రభుత్వంపై ఉందని బండి తెలిపారు.