ఇంద్రకీలాద్రి శ్రీ దుర్గామల్లేశ్వర స్వామి వార్ల దేవస్థానంలో ఆషాఢ మాస ఉత్సవాల సందర్భంగా ఈనెల 15 నుండి ప్రారంభం కానున్న అమ్మవారి ‘సారె సమర్పణ’ మహోత్సవాలకు దేవస్థానం సర్వసిద్ధమైంది. ఈ నేపథ్యంలో భక్తులకు కల్పిస్తున్న సౌకర్యాలు, క్యూ లైన్ల నిర్వహణను ఆలయ ఈవో వి.కె. శీనా నాయక్, ధర్మకర్తల మండలి సభ్యులు మరియు ఆలయ అధికారులతో కలిసి క్షేత్రస్థాయిలో విస్తృతంగా పరిశీలించారు.

​ఈ సందర్భంగా ఈవో శీనా నాయక్ మాట్లాడుతూ, ఆషాఢ సారె సమర్పణకు విచ్చేసే భక్తుల రద్దీని దృష్టిలో ఉంచుకుని ఈ ఏడాది ప్రత్యేక మరియు పక్కా ప్రణాళికలతో ఏర్పాట్లు చేస్తున్నట్లు తెలిపారు. భక్తుల సౌకర్యార్థం ఈసారి శ్రీ కనకదుర్గ నగర్‌లోనే క్లోక్ రూమ్, ఉచిత పాదరక్షల స్టాండ్ (చెప్పుల స్టాండ్), మరియు మొబైల్ ఫోన్లు భద్రపరుచుకునే పాయింట్లను ఏర్పాటు చేస్తున్నట్లు వెల్లడించారు.