తెలంగాణ అసెంబ్లీ ఎన్నికలకు అధికారులు విస్తృత ఏర్పాట్లు చేస్తున్నారు. ఎన్నికల సంఘం ఇప్పటికే 35 వేలకు పైగా పోలింగ్ కేంద్రాలను ఏర్పాటు చేసింది. తాజాగా ఓట్ల లెక్కింపు కేంద్రాలపై స్పష్టత వచ్చింది. డిసెంబర్ 3న నిర్వహించనున్న కౌంటింగ్ కోసం గ్రేటర్ పరిధిలో మొత్తం 49 కేంద్రాలను ఏర్పాటు చేయనున్నట్టు ప్రకటించగా.. ఒక్క హైదరాబాద్ లోనే మొత్తం 14 కౌంటింగ్ కేంద్రాలను ఏర్పాటు చేస్తున్నట్లు వివరించింది. ఇందులో భాగంగానే ఏర్పాట్లను శరవేగంగా పూర్తిచేస్తున్నట్లు అధికారులు తెలిపారు. జూబ్లీహిల్స్, ఖైరతాబాద్ నియోజకవర్గాల్లో పోలైన ఓట్లను యూసుఫ్ గూడలోని కోట్ల విజయభాస్కర్ రెడ్డి ఇండోర్ స్టేడియంలో లెక్కించనున్నట్లు అధికారులు తెలిపారు. మిగిలిన 13 నియోజకవర్గాలకు ప్రత్యేక కౌంటింగ్ కేంద్రాలను ఏర్పాటు చేస్తున్నామని వివరించారు. రాష్ట్రవ్యాప్తంగా మొత్తం 49 కేంద్రాలు, రంగారెడ్డి జిల్లాలో 4, మిగిలిన జిల్లాల్లో ఒక్కో కేంద్రాన్ని ఏర్పాటు చేసే పనిలో నిమగ్నమై ఉన్నామని తెలిపారు.