చిత్తూరు జిల్లా పుంగనూరులో హైటెన్షన్ వాతావరణం నెలకొంది. సదుంలో రైతుభేరీ సభ నిర్వహించేందుకు సిద్దమైన భారత చైతన్య యువజన పార్టీ అధ్యక్షుడు భేరి రామచంద్ర యాదవ్ ను పోలీసులు అడ్డుకున్నారు. రైతు భేరీకి వెళ్లకుండా యాదవ్ ఇంటిని పోలీసులు చుట్టుముట్టారు. పుంగనూరుకు వెళ్లే వాహనాలను పోలీసులు క్షుణ్ణంగా తనిఖీలు చేస్తున్నారు. అలాగే రామచంద్ర యాదవ్ ఇంటి వైపు వచ్చే వాహనాలను అడ్డుకుంటున్నారు. రైతు భేరి కార్యక్రమానికి సంబంధించి జెండాలను, పోస్టర్లను రాత్రికి రాత్రే గుర్తు తెలియని వ్యక్తులు తొలగించారు. రామచంద్ర యాదవ్ ఇంటి వద్ద ఆంక్షలు విధించారు. ప్రతి ఒక్కరి ఐడి కార్డులను పరిశీలించి పంపుతున్నారు. హైకోర్ట్ ఉత్తర్వులు ఉన్నప్పటికీ సభ నిర్వహించేందుకు పోలీసులు అనుమతి ఇవ్వలేదు. ఎస్పీ అనుమతి తీసుకుని సభ నిర్వహించుకోవాలని పోలీసులు రామచందర్ యాదవ్ కు సూచించారు. పోలీసుల ఓవర్ యాక్షన్ పై బిసివై పార్టీ కార్యకర్తలు మండిపడుతున్నారు.