పాక్ ఆక్రమిత కశ్మీర్లో మరోసారి అసంతృప్తి జ్వాలలు రగులుతున్నాయి. ఎన్నికల వ్యవస్థ, రిజర్వ్ చేసిన అసెంబ్లీ స్థానాలు, స్థానికుల హక్కులు, పరిపాలన తీరుపై వేలాది మంది ప్రజలు వీధుల్లోకి వచ్చి నిరసన వ్యక్తం చేస్తున్నారు. ముఖ్యంగా జాయింట్ అవామీ యాక్షన్ కమిటీ ఆధ్వర్యంలో చేపట్టిన ఆందోళనలు తీవ్ర ఉద్రిక్తతకు దారితీశాయి. రవాలకోట్, ముజఫరాబాద్తో పాటు పలు ప్రాంతాల్లో నిరసనకారులు–భద్రతా బలగాల మధ్య ఘర్షణలు చోటుచేసుకున్నాయి. తాజా నివేదికల ప్రకారం కాల్పులు, హింసాత్మక ఘటనల్లో పలువురు ప్రాణాలు కోల్పోగా, వందలాది మంది గాయపడినట్లు అంతర్జాతీయ మీడియా వెల్లడించింది.
నిరసనలను అణచివేయడానికి పాకిస్తాన్ ప్రభుత్వం భారీ భద్రతా బలగాలను మోహరించడంతో పాటు, నిరసనలకు నాయకత్వం వహిస్తున్న జాయింట్ అవామీ యాక్షన్ కమిటీపై ఉగ్రవాద నిరోధక చట్టాల కింద చర్యలు ప్రారంభించింది. పలువురు నాయకులపై దేశద్రోహం కేసులు నమోదు చేసినట్లు, అరెస్టులకు బహుమతులు కూడా ప్రకటించినట్లు వార్తలు వచ్చాయి. మరోవైపు మానవ హక్కుల సంస్థలు ఈ చర్యలపై ఆందోళన వ్యక్తం చేస్తూ, శాంతియుత నిరసనలను అణచివేయడం పరిస్థితిని మరింత ఉద్రిక్తం చేస్తుందని హెచ్చరిస్తున్నాయి.
ఈ పరిణామాలు పాక్ ఆక్రమిత కశ్మీర్లో పాలన, ప్రజాస్వామ్య హక్కులు, స్థానికుల ప్రాతినిధ్యం వంటి అంశాలపై మళ్లీ చర్చకు దారితీశాయి.
