పెద్దపల్లి జిల్లా రామగుండం రైల్వే స్టేషన్ సమీపంలో ఉన్న యార్డులో ప్రమాదం జరిగింది. యార్డు చివరన నిలిచి ఉన్న యుటిలిటీ ట్రాక్ వెహికల్ ను ఖాళీగా ఉన్న ఐదు వ్యాగన్లు వేగంగా ఢీకొనడంతో బయటికి దూసుకువెళ్ళింది. నిన్న అర్ధరాత్రి దాటిన తర్వాత రైల్వే యార్డులో షంటింగ్ ఆపరేషన్ జరుగుతున్న సమయంలో గూడ్స్ రైలు నుంచి బోగీలు తప్పి వేగంగా వెళ్లి యుటిలిటీ వెహికల్ ను ఢీకొట్టాయి. అయితే ఈ సంఘటనలో ఎలాంటి ప్రాణాష్టం జరగలేదు. యుటిలిటీ వెహికల్ లో ఓ డ్రైవర్ ఉన్నట్లు తెలిసింది గాని రైల్వే అధికారులు ఎలాంటి సమాచారాన్ని ఇవ్వడం లేదు. ఈ సంఘటనపై రైల్వే అధికారులు ఎంక్వయిరీ చేస్తున్నారు.