135 సంవత్సరాల సుదీర్ఘ చరిత్ర కలిగిన సింగరేణి సంస్థ 2023-24 ఆర్థిక సంవత్సరానికి గాను నిర్ధేశించిన 78 మిలియన్ టన్నుల బొగ్గు ఉత్పత్తిలో ఇప్పటివరకు 51.74 కు గాను 47.59 మిలియన్ టన్నుల బొగ్గు ఉత్పత్తి సాధించి 92 శాతం లక్ష్యాన్ని చేరుకుందని అర్జీ1 జిఎం చింతల శ్రీనివాస్ అన్నారు. ఈ మేరకు పెద్దపల్లి జిల్లా గోదావరిఖని సింగరేణి స్టేడియంలో ఏర్పాటు చేసిన 135వ ఆవిర్భావ దినోత్సవ వేడుకలను జిఎం శ్రీనివాస్ ప్రారంభించారు. ముందుగా సింగరేణి పతకాన్ని ఆవిష్కరించి అనంతరం సంస్థ ఏర్పాటు చేసిన 22 స్టాల్స్ ను అధికారులతో కలిసి ఆయన ప్రారంభించారు. సంస్థ ఉత్పత్తి ఒకటే కాకుండా పర్యావరణం పై కూడా ప్రత్యేక శ్రద్ధ చూపుతోందన్నారు. ఒక కోటి 59 లక్షల రూపాయల సి ఎస్ ఆర్ నిధులు వెచ్చించి రాజీ రహదారి వెంబడి 24 కిలోమీటర్ల మేర మొక్కలు నాటించడం జరిగిందన్నారు. ఉద్యోగులు మరియు వారి కుటుంబ సభ్యుల మానసిక ఉల్లాసానికి ఆహ్లాద భరితమైన పార్కుల నిర్మాణం చేయడం జరిగిందన్నారు. నూతన టెక్నాలజీని ఉపయోగించి, కార్మికుల సంక్షేమంతో పాటు రక్షణతో కూడిన బొగ్గు ఉత్పత్తిని సాధిస్తున్నామని జిఎం శ్రీనివాస్ తెలిపారు.