పశ్చిమాసియాలో తీవ్ర ఉద్రిక్తతలకు తెరపడింది. అమెరికా, ఇరాన్ దేశాల మధ్య ఎట్టకేలకు చారిత్రాత్మక శాంతి ఒప్పందం కుదిరింది. ఈ విషయాన్ని అమెరికా అధ్యక్షుడు డొనాల్డ్ ట్రంప్ అధికారికంగా ప్రకటిస్తూ, ఈ శాంతి ఒప్పందానికి సహకరించిన ప్రతి ఒక్కరికీ తన హృదయపూర్వక అభినందనలు తెలియజేశారు. ఈ ఒప్పందంలో భాగంగా అంతర్జాతీయ వాణిజ్యానికి అత్యంత కీలకమైన హర్మూజ్ జలసంధిని ఎలాంటి అదనపు సుంకాలు లేకుండా తెరిచామని ట్రంప్ ప్రకటించారు. ఇరాన్ ఓడరేవులపై ఉన్న దిగ్బంధాన్ని తక్షణమే ఎత్తివేయాలని తాను ఆదేశాలు జారీ చేసినట్లు ఆయన స్పష్టం చేశారు. ఈ సందర్భంగా ప్రపంచ వాణిజ్య రంగాన్ని ఉద్దేశించి ట్రంప్ తనదైన శైలిలో… ప్రపంచంలోని నౌకలు… మీ ఇంజిన్లను స్టార్ట్ చేయండి… ఇకపై ఎలాంటి ఆంక్షలు లేకుండా హర్మూజ్ జలసంధి ద్వారా చమురు రవాణాను ప్రారంభించండని పిలుపునిచ్చారు.

మరోవైపు, అమెరికా-ఇరాన్ మధ్య కుదిరిన ఈ శాంతి ఒప్పందాన్ని పాకిస్తాన్ ప్రధాని షెహబాజ్ షరీఫ్ ధృవీకరించారు. ఈ నెల 19వ తేదీన ఇరు దేశాల ప్రతినిధులు ఈ శాంతి ఒప్పందంపై అధికారికంగా సంతకాలు చేయనున్నట్లు ఆయన వెల్లడించారు. ఇందుకు స్విడ్జర్లాండ్ వేదిక కానుందని పేర్కొన్నారు. ఈ ఒప్పందం ప్రకారం… ఇరు దేశాలు తమ మిలటరీ ఆపరేషన్లను పూర్తిగా నిలిపివేస్తాయని షెహబాజ్ స్పష్టం చేశారు. యుద్ధ వాతావరణాన్ని తగ్గించేందుకు, ఉద్రిక్తతలకు స్వస్తి పలికేందుకు ఇరు దేశాలు దౌత్యపరమైన అత్యుత్తమ పరిష్కారాన్ని ఎంచుకోవడం అభినందనీయమన్నారు. ఈ చారిత్రాత్మక శాంతి ఒప్పందం ఖరారు కావడంలో ఖతార్ దేశం అత్యంత కీలకమైన పాత్ర పోషించిందని పాక్ ప్రధాని కొనియాడారు. ఇరు దేశాలను ఒకే తాటిపైకి తెచ్చేందుకు ప్రత్యక్షంగా, పరోక్షంగా సహకరించిన మిగిలిన అన్ని దేశాలకు కూడా ఆయన ప్రత్యేక ధన్యవాదాలు తెలిపారు.