తెలంగాణలో ప్రభుత్వ ఉద్యోగాల కోసం సిద్ధమవుతున్న నిరుద్యోగ యువతకు రాష్ట్ర ప్రభుత్వం పెద్ద తీపి కబురు చెప్పింది. పోలీస్, ఎక్సైజ్, ఫారెస్ట్ తదితర యూనిఫాం సర్వీసుల ఉద్యోగ నియామకాల్లో గరిష్ట వయోపరిమితిని మరో రెండేళ్ల పాటు పెంచుతూ శుక్రవారం కీలక నిర్ణయం తీసుకుంది. గతంలో ఇచ్చిన ఐదేళ్ల సడలింపునకు అదనంగా ఈ రెండేళ్లను జత చేసింది. అంటే.. మొత్తంగా యూనిఫాం ఉద్యోగాల అభ్యర్థులకు ఏకంగా 7 ఏళ్ల వయోపరిమితి సడలింపు లభించినట్లయింది. ఈ మేరకు ప్రభుత్వ ప్రధాన కార్యదర్శి సంజయ్ జాజు అధికారికంగా జీవో జారీ చేశారు. ప్రభుత్వ తాజా నిర్ణయంతో రాష్ట్రవ్యాప్తంగా వేలాది మంది నిరుద్యోగులకు రాబోయే నోటిఫికేషన్లలో పోటీ పడేందుకు అవకాశం లభించింది.యూనిఫాం పోస్టుల భర్తీకి సంబంధించి వయోపరిమితిని సడలించాలని ఎంతో కాలంగా నిరుద్యోగ అభ్యర్థుల నుంచి ప్రభుత్వానికి విజ్ఞప్తులు వస్తున్నాయి. వయోపరిమితి ముగిసిపోవడం వల్ల తాము పరీక్షలు రాసే అవకాశాన్ని కోల్పోతున్నామని, కాబట్టి వయోపరిమితిని సడలించి తమకు న్యాయం చేయాలని పెద్ద ఎత్తున విజ్ఞప్తి చేశారు. అభ్యర్థుల నుంచి వచ్చిన విజ్ఞప్తులను సానుకూలంగా పరిశీలించిన ప్రభుత్వం.. వయోపరిమితిని సడలించడమే సరైన నిర్ణయమని భావించింది. ఈ ఏడాది మే 18న విడుదల చేసిన జీవో నంబర్ 87 ద్వారా ఇప్పటికే ఐదేళ్ల వయోపరిమితిని పెంచిన ప్రభుత్వం, ఇప్పుడు నిరుద్యోగుల అభ్యర్థన మేరకు దానికి అదనంగా మరో రెండేళ్లు పెంచుతూ సరికొత్త ఉత్తర్వులు ఇచ్చింది.

ప్రభుత్వం జారీ చేసిన ఈ తాజా అడ్-హాక్ రూల్ ప్రకారం.. ఈ వయోపరిమితి సడలింపు అనేది పలు కీలక శాఖల్లో రాబోయే ప్రత్యక్ష నియామకాలకు వర్తిస్తుంది. పోలీస్, ఫైర్ సర్వీసెస్, జైళ్ల శాఖ, స్పెషల్ ప్రొటెక్షన్ ఫోర్స్ , ఎక్సైజ్, రవాణా (ట్రాన్స్‌పోర్ట్), అటవీ (ఫారెస్ట్) శాఖల్లోని యూనిఫాం పోస్టులన్నింటికీ ఈ ఏడేళ్ల అదనపు వయోపరిమితి సడలింపు లభిస్తుంది. దీనికి సంబంధించిన నోటిఫికేషన్‌ను తెలంగాణ స్టేట్ గెజెట్‌లో ప్రచురించాలని ప్రభుత్వం ఆదేశించింది. ఈ ఉత్తర్వుల కాపీలను తెలంగాణ స్టేట్ లెవెల్ పోలీస్ రిక్రూట్‌మెంట్ బోర్డ్ (TSLPRB), తెలంగాణ పబ్లిక్ సర్వీస్ కమిషన్‌ తో పాటు అన్ని జిల్లాల కలెక్టర్లకు, శాఖాధిపతులకు పంపించారు. రానున్న పోలీస్, ఇతర రిక్రూట్‌మెంట్ల కోసం ఎదురుచూస్తున్న యువతకు ఇది కొండంత అండగా నిలుస్తుందని నిరుద్యోగ అభ్యర్థులు హర్షం వ్యక్తం చేస్తున్నారు.

రాష్ట్రంలో ఎండలు మండిపోతున్న నేపథ్యంలో తెలంగాణ ప్రభుత్వం కీలక నిర్ణయం తీసుకుంది.జూన్ 2న పరేడ్ గ్రౌండ్స్‌లో జరిగే రాష్ట్ర అవతరణ ఉత్సవాలను గంటన్నరలోనే పూర్తి చేయాలని అధికారులకు ముఖ్యమంత్రి రేవంత్ రెడ్డి సూచించారు. సికింద్రాబాద్ పరేడ్ గ్రౌండ్స్‌లో నిర్వహించ తలపెట్టిన రాష్ట్ర అవతరణ ఉత్సవాలను ఉదయం 8.30 గంటలకే ప్రారంభించేలా ఏర్పాట్లు చేయాలని ఆదేశించారు.ఈ ఉత్సవాల్లో జాతీయ పతాకావిష్కరణతో పాటు అన్ని రకాల అధికారిక అవతరణ కార్యక్రమాలను నిర్దేశిత సమయానికే పూర్తి చేయాలని అధికారులకు సూచించారు. ప్రస్తుతం రాష్ట్రవ్యాప్తంగా పగటి ఉష్ణోగ్రతలు భారీగా నమోదవుతున్న నేపథ్యంలో పరేడ్ గ్రౌండ్స్ వేడుకలకు హాజరయ్యే అతిథులకు, ప్రజలకు ఇబ్బంది లేకుండా తగిన చర్యలు తీసుకోవాలని సీఎం ఆదేశించారు.

క్షేత్రస్థాయి కార్యకర్తలను తాను 10 రోజులకోసారి కలుస్తానని.. నెలలో మూడు రోజులు వారి కోసం సమయం కేటాయిస్తానని గాంధీభవన్‌లోఏర్పాటు చేసిన కాంగ్రెస్‌ రాష్ట్ర రాజకీయ వ్యవహారాల కమిటీ సమావేశంలో చెప్పారు. తనతో సహా ఎవరు.. ఎక్కడికి వెళ్లాలనేది పీసీసీ అధ్యక్షుడు నిర్ణయిస్తారని సీఎం రేవంత్ రెడ్డి చెప్పారు. ఇన్‌ఛార్జి మంత్రులు ఆయా జిల్లాకు ప్రతి 10 రోజుల్లో ఒకరోజు వెళ్లి.. పార్టీ కార్యక్రమాల కోసం పూర్తిగా సమయం కేటాయించాలని పిలుపు ఇచ్చారు. మంత్రులు, ఎంపీలు, ఎమ్మెల్యేలు, ఎమ్మెల్సీలు, కార్పొరేషన్ల ఛైర్‌పర్సన్లు, సీనియర్‌ నాయకులు వారంలో ఒకరోజు నియోజకవర్గాలకు వెళ్లి కార్యకర్తలను కలవాలన్నారు. ప్రతిపక్షంలో ఉన్నప్పుడు కాంగ్రెస్‌ క్యాడర్‌.. సోషల్‌ మీడియా వారియర్లుగా మారి.. పార్టీ కోసం పనిచేశారన్నారు. కానీ, ఇప్పుడు కొన్ని నియోజకవర్గాల్లో ఎమ్మెల్యేలు జమీందార్లలా తయారయ్యారని… వ్యక్తిగత ప్రచారం చేసుకోవడమే తప్ప.. పార్టీ, ప్రభుత్వ కార్యక్రమాలను ప్రచారం చేయనీయడం లేదన్నారు. పార్టీ కోసం సోషల్‌ మీడియా వినియోగంపై ఎమ్మెల్యేలకు శిక్షణ ఇవ్వాలన్నారు.ఓటర్ల జాబితా ప్రత్యేక సవరణ కార్యక్రమం పై పార్టీ నాయకులంతా సమన్వయంతో పనిచేయాలన్నారు సీఎం రేవంత్ రెడ్డి. 119 అసెంబ్లీ, 17 లోక్‌సభ నియోజకవర్గాల్లో ‘సర్‌’ పర్యవేక్షణకు ఇన్‌ఛార్జులను నియమించాలన్నారు.