ఎన్నికలకు ఎంతో సమయం లేదు – పురందేశ్వరి

2024 ఎన్నికలకు ఎంతో సమయం లేదని కార్యకర్తలందరూ సిద్ధంగా ఉండాలని పిలుపునిచ్చారు ఏపీ బీజేపీ అధ్యక్షురాలు దగ్గుబాటి పురందేశ్వరి. పొత్తుల విషయం పక్కన పెట్టి బలంగా పని చేసేలా కార్యాచరణ సిద్ధం చేసుకోవాలని సూచించారు. ప్రతి గ్రామానికి బీజేపీ నాయకులు వెళ్లి అక్కడ ఉన్న సమస్యలు తెలుసుకుని పరిష్కరించే దిశగా అడుగులు వేయాలన్నారు. మన సిద్ధాంతాలు ఎప్పుడు మండల స్థాయి, బూత్ స్థాయి పోరాటాలేనని తెలిపారు. రాష్ట్రంలోని అభివృద్ధి అంతా కేంద్ర ప్రభుత్వ నిధులతోనే జరుగుతోందన్నారు. ఆంధ్రప్రదేశ్ ను అగ్రస్థానంలో నిలబెట్టేందుకు కేంద్రం ఎప్పుడూ కృషి చేస్తూనే ఉంటుందని అన్నారు. కేంద్రం చేపట్టిన పనులు ప్రజలకు తెలియజెప్పేందుకే ఛలో అభియాన్ కార్యక్రమం చేపట్టడం జరిగిందని దగ్గుబాటి పురందేశ్వరి తెలిపారు.