పాకిస్థాన్లో ఆర్థిక సంక్షోభం, ద్రవ్యోల్బణం ప్రభావంతో సామాన్యులపై నిత్యావసరాల ధరల భారం మరింత పెరిగింది. గోధుమ పిండి, బియ్యం, పప్పులు, వంట నూనె, పంచదార వంటి ప్రాథమిక ఆహార పదార్థాల ధరలు భారీగా పెరిగినట్లు నివేదికలు చెబుతున్నాయి. ఒకవైపు రూపాయి విలువ పడిపోవడం, మరోవైపు దిగుమతుల వ్యయం పెరగడంతో మార్కెట్లలో ధరలు అదుపు తప్పుతున్నాయి. దీంతో రోజువారీ అవసరాలు తీర్చుకోవడమే పాక్ ప్రజలకు సవాల్గా మారింది.
పాకిస్థాన్ లో చికెన్, మటన్, గుడ్లు, పాలు, కూరగాయల ధరలు కూడా సామాన్యులకు షాక్ ఇస్తున్నాయి. చికెన్ ధరలు రికార్డు స్థాయికి చేరడంతో మాంసాహారాన్ని కొనుగోలు చేయడం మధ్యతరగతి కుటుంబాలకు కూడా భారంగా మారింది. పాలు, గుడ్లు వంటి నిత్యావసరాల ధరలు పెరగడంతో కుటుంబ బడ్జెట్పై తీవ్ర ప్రభావం పడుతోంది. పిండి, బియ్యం వంటి ప్రధాన ఆహార పదార్థాల ధరలు పెరగడం పేద, మధ్యతరగతి వర్గాలపై మరింత ఒత్తిడిని పెంచుతోంది.
ఇంధన ధరల పెరుగుదల పరిస్థితిని మరింత క్లిష్టంగా మారుస్తోంది. పెట్రోల్, డీజిల్ ధరలు పెరగడంతో రవాణా ఖర్చులు అధికమవుతున్నాయి. రవాణా వ్యయం పెరగడం వల్ల ఆ ప్రభావం నేరుగా నిత్యావసరాల ధరలపైనా పడుతోంది. విద్యుత్, గ్యాస్ ఛార్జీలు కూడా పెరగడంతో ప్రజల నెలవారీ ఖర్చులు భారీగా పెరిగాయి. ఆదాయాలు అదే స్థాయిలో ఉండగా ఖర్చులు పెరగడంతో పాక్ ప్రజల కొనుగోలు శక్తి తగ్గిపోతోంది.
విదేశీ మారక నిల్వలు, కరెన్సీ విలువ, ద్రవ్యోల్బణం వంటి సమస్యలు పాకిస్థాన్ ఆర్థిక వ్యవస్థపై తీవ్ర ఒత్తిడిని కొనసాగిస్తున్నాయి. నిత్యావసరాల ధరల పెరుగుదలతో పేద, మధ్యతరగతి కుటుంబాలు తీవ్ర ఇబ్బందులు ఎదుర్కొంటున్నాయి. ఒకప్పుడు సబ్సిడీ పిండి కోసం బారులు తీరిన పరిస్థితులు కనిపించగా.. ఇప్పుడు ఆహారం నుంచి ఇంధనం వరకు ప్రతిదీ ఖరీదైనదిగా మారింది. ఆర్థిక సంక్షోభం నుంచి పాకిస్థాన్ ఎలా బయటపడుతుందన్నది ఇప్పుడు కీలకంగా మారింది.
