ఆంధ్రప్రదేశ్‌లో డీఎస్సీ నియామకాల అంశం రాజకీయంగా ఉద్రిక్తతకు దారితీసింది. విజయవాడ, అనంతపురం, నెల్లూరు జిల్లాల్లో వైసీపీ చేపట్టిన రిలే నిరాహార దీక్షలకు ప్రతిగా టీడీపీ ఆందోళనలు నిర్వహించింది. డీఎస్సీ నియామకాల్లో అక్రమాలు జరిగాయని ఆరోపిస్తూ వైసీపీ నిరసనలు చేపట్టగా, అవి దుష్ప్రచారమని ఖండిస్తూ టీడీపీ శ్రేణులు రోడ్డెక్కాయి. ఒకవైపు టీడీపీ జెండాలు, మరోవైపు వైసీపీ జెండాలతో ఇరు పార్టీల కార్యకర్తలు పోటాపోటీగా నినాదాలు చేశారు. ఈ క్రమంలో పలుచోట్ల ఇరు వర్గాల మధ్య తోపులాట, వాగ్వాదం చోటుచేసుకుంది. పరిస్థితి ఉద్రిక్తంగా మారడంతో పోలీసులు వెంటనే జోక్యం చేసుకుని రెండు వర్గాలను చెదరగొట్టేందుకు ప్రయత్నించారు. ఎలాంటి అవాంఛనీయ ఘటనలు జరగకుండా భారీ పోలీసు బందోబస్తు ఏర్పాటు చేశారు.