తిరుపతి జిల్లాలో అర్ధరాత్రి వేళ ఓ లారీ డ్రైవర్ మద్యం మత్తులో సృష్టించిన బీభత్సం కలకలం రేపింది. చంద్రగిరి మండలం కొంగరివారిపల్లె సమీపంలో లారీ డ్రైవర్ మద్యం మత్తులో కలకలం సృష్టించాడు. చిత్తూరు వైపు నుంచి కట్టెల లోడ్‌తో అతివేగంగా తిరుపతి వైపు వస్తున్న లారీ.. ఒక్కసారిగా నియంత్రణ కోల్పోయింది. రోడ్డు పక్కనే ఉన్న చెట్టును, అక్కడ ఆగి ఉన్న ఒక కారును బలంగా ఢీకొట్టింది. అంతటితో ఆగకుండా పక్కనే ఉన్న ఒక చిల్లర దుకాణాన్ని కూడా లారీ పూర్తిగా ధ్వంసం చేసింది. ప్రమాదం జరిగిన సమయంలో అక్కడ స్థానికులు ఎవరూ లేకపోవడంతో పెద్ద ప్రాణాపాయం తప్పింది. ప్రమాదాన్ని గమనించిన స్థానికులు.. లారీ డ్రైవర్, క్లీనర్‌లను అక్కడికక్కడే పట్టుకుని దేహశుద్ధి చేశారు. అనంతరం వారిని పోలీసులకు అప్పగించారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.