గూఢచర్య ఉపగ్రహ ప్రయోగాన్ని ఉత్తర కొరియా విజయవంతంగా పూర్తి చేసింది. మలిగ్యాంగ్-1 రాకెట్‌ ద్వారా దీన్ని నిర్ణీత కక్ష్యలోకి ప్రవేశపెట్టింది. స్వయంగా ఉత్తర కొరియా అధినేత కిమ్ జోంగ్ దగ్గరుండి ఈ ప్రయోగాన్ని పర్యవేక్షించారు. స్పై శాటిలైట్ కక్ష్యలోకి చేరిన తర్వాత.. అమెరికాలోని గువామ్‌లో ఉన్న సైనిక స్థావరాలను ఫొటోలను ఉత్తర కొరియా ఆర్మీకి పంపించింది. ఈ ఉపగ్రహం జపాన్‌లోని ఒకినావా ద్వీపం మీదుగా పసిఫిక్ మహాసముద్రం వైపునకు వెళ్లింది. ఈ ప్రయోగం నేపథ్యంలో జపాన్ ప్రభుత్వం ప్రజలకు హెచ్చరికలు జారీచేసింది. ఒకినావా ప్రాంతంలో ఎవరూ ఇళ్ల నుంచి బయటకు రావొద్దని సూచించింది. ఈ ప్రయోగంతో ఐక్యరాజ్యసమితి తీర్మానాలను ఉత్తర కొరియా ఉల్లంఘించిందని అమెరికా ఆరోపించింది. దక్షిణ కొరియా, జపాన్, అమెరికాలలోని సైనిక స్థావరాలను ట్రాక్ చేసే లక్ష్యంతో ఈ గూఢచర్య ఉపగ్రహాన్ని ఉత్తర కొరియా ప్రయోగించింది. ఈ ఏడాదిలో ఇంతకుముందు రెండుసార్లు గూఢచర్య ఉపగ్రహాన్ని ఉత్తర కొరియా ప్రయోగించగా అది కక్ష్యలోకి చేరలేకపోయింది. ఈసారి మాత్రం ప్రయోగం సక్సెస్ అయింది.