ఇప్పుడు టెక్ ప్రపంచంలో ఎక్కడ చూసినా ఏఐ గురించే ఎక్కువగా చర్చ జరుగుతోంది. మైక్రోసాఫ్ట్ భాగస్వామ్యంతో ఓపెన్ ఏఐ సంస్థ తీసుకువచ్చిన ఏఐ ఆధారిత టూల్ చాట్ జీపీటీ వస్తూనే సంచలనం సృష్టించింది. దాంతో ప్రత్యర్థి టెక్ సంస్థలు కూడా ఏఐ బరిలో దిగాయి. ప్రముఖ సెర్చ్ ఇంజిన్ దిగ్గజం గూగుల్ కూడా చాట్ జీపీటీకి పోటీగా బార్డ్ ను తెరపైకి తెచ్చింది. ఇప్పుడు తన బార్డ్ ను మరింత ఆధునికీకరించే చర్యల్లో భాగంగా గూగుల్ సరికొత్త ఏఐ నమూనా జెమినీని అభివృద్ధి చేసింది. దీనిపై గూగుల్ సీఈవో సుందర్ పిచాయ్ స్పందించారు. ఇది జెమినీ శకానికి ఆరంభం అని అభివర్ణించారు. సెర్చ్ రిజల్ట్స్ లో ఏఐ సాంకేతికతను చొప్పించి ప్రజలకు అందించడానికి డీప్ మైండ్ ఏఐ ల్యాబ్ ను స్థాపించాం వివరించారు. ఆనాటి మా ఆలోచనలకు వాస్తవరూపమే ఈ జెమినీ ఏఐ నమూనా అని తెలిపారు. దీనికి సంబంధించిన పరిశోధనలను మేం ఎంతో ధైర్యంగా, బాధ్యతతో చేపడుతున్నాం అన్నారు. ఓ లక్ష్యం దిశగా ఆవిష్కరణలు చేయడం, ప్రజలకు, సమాజానికి అపారమైన ప్రయోజనాలు చేకూర్చే సామర్థ్యాలను అందిపుచ్చుకోవడం మా ప్రాధాన్యత అంశాలు అని పేర్కొన్నారు.